នាព្រឹកថ្ងៃពុធ ទី១៩ ខែវិច្ឆិកា ឆ្នាំ២០២៥ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា (គណៈកម្មការ ទី៨) និងក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានគណៈកម្មការ និងជាប្រធានក្រុមសមាជិកា ដោយមានការយាងអញ្ជើញចូលរួមពី សម្ដេចរាជបុត្រីព្រះអនុជ នរោត្តម អរុណរស្មី សមាជិកាព្រឹទ្ធសភា និងជាឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានអញ្ជើញ-យាងចុះទស្សនកិច្ច និងជួបសំណេះសំណាលជាមួយគណៈកម្មការសហគមន៍នេសាទត្រពាំងរពៅ នៅទីស្នាក់ការសហគមន៍ ស្ថិតនៅភូមិត្រពាំងរពៅ ឃុំព្រែកត្នោត ស្រុកទឹកឈូ ខេត្តកំពត។
មានប្រសាសន៍ក្នុងពិធីនោះ លោកជំទាវប្រធានគណៈប្រតិភូ បានសម្តែងនូវសេចក្តីរីករាយ និងកោតសរសើរ ព្រមទាំងជំរុញលើកទឹកចិត្តដល់សហគមន៍ត្រូវខិតខំបន្តអភិរក្ស និងអភិវឌ្ឍន៍លើវិស័យទេសចរណ៍ឱ្យកាន់តែមានភាពទាក់ទាញខ្លាំងបន្ថែមទៀត ដើម្បីឆ្លើយតបតម្រូវការប្រជាពលរដ្ឋ និងភ្ញៀវទេសចរ ដែលនឹងបង្កើតជាឱកាសការងារ និងប្រាក់ចំណូលជាច្រើនជូនប្រជាសហគមន៍ និងពលរដ្ឋក្នុងតំបន់តាមរយៈការប្រមូលភោគផលសមុទ្រ និងការផ្តល់សេវាកម្មផ្សេងៗ។ ជាមួយគ្នានេះ គណៈប្រតិភូក៏បានឧបត្ថម្ភជូនសហគមន៍នូវថវិកាចំនួន ១លានរៀលផងដែរ។
ប្រភព៖ ការិយាល័យជំនួយការគណៈកម្មការទី៨ព្រឹទ្ធសភា
